**أنواع البشر على النت**

من طرف **مروج امجد** الأحد نوفمبر 21, 2010 4:31 pm

النوع الاول - اللي يادوبك لسه متعلم يدخل نت

تلاقيه اول ما يدخل : يقولك هــاي ......- طب فين السلام عليكم- ممكن نتعرف انا فلان ومن الحته الفلانيه وتحس ان فيه حنفيه معلومات اتفتحت واي حاجة تقولهاله يقولك يعني ايه مش فاهم؟؟ وبعد كل كلمة يقولك اصل انا لسه جديد في النت والنوعية دي تنقسم لقسمين :

1- يا اما متحمس وحط ف دماغه موضوع النت وعايز يتعلم

2- يا اما سمع من صحابه عن النت والبنات وجاي يجرب حظه

النوع الثانى- الي بيقعد على النت بس مش كتير
النوع ده كل كلامه :انا مشغولياتي كتير ومبحبش النت والكلام ده وبعد ما يتكلم شوية يقولك
ممكن نكمل كلام في التليفون انا اصلي مبدخلش النت كتير ومليش خلق للكتابة والحاجات دي
والنوعيه دي تنقسم الى قسمين:
1- يا اما يبقى لحوح ويفضل يطلب نفس الطلب وصباح الملل.
2- يا اما يبقى عنده عزة نفس وميلحش بس هيتعصب وهيقولك اعملّي بلوك

.

النوع الثالث- الي قاعد على النت ليل نهار وده بقى شرحه يطول وينقسم لعدة انواع:

1- المقموص : ده بقى قاعد وحاطط ايده على زرار الزعل , اي حاجة تقولها تبقي بتقصده او بتقلل من شانه , انما لما هو يتكلم أي كلام ويغلط في أي حد , او يقول كلام مش كويس يرجع يقولك
انا بعتذر , ولما يتزنق يقولك اصل انا كنت بهزر , وطبعا كلام من اياه ولو دورت في ال20 سطر اللي كتبهم مش هتلاقي كلمة- انا اسف – لانه بعد كل اللي عمله وقاله برضه مقموص وغروره بيمنعه يقول: انا اسف . وبعد كام مرة كلام- لو استمريت في معرفته- ممكن يقولك ادينينمرة تليفونك ولما ترفض هيقولك انا هحترم رغبتك وهيرّكب الوش الخشب ومن وقت للتاني هتاخد البلوك ف وشك , , فنصيحه من اولها كده اديه بلوك وديليت من اولها . , وطبعا المقموص ممكن في المنتديات يبقى مشكله كبيرة قوي , وممكن يسخن عليك الاعضاء ويعمل نفسه معملش حاجه وانه الملاك البريء ..يقتل القتيل ويمشي في جنازته .

2- ابو دم خفيف:ده شلل مركز , ومتعرفش مين الي خدعه وقاله ان دمه خفيفوكل كلامه قفشات وضحك على الفاضي والمليان وتلاقيه وانت بتتكلم في موضوع جد يقولك بكل عبط: هههههههههه -والمفروض انك تكون مجاملوتضحك , بس منصحكش تيجي على اعصابك .

3- المودي : ده بقة شخصية بتتنوع كل يوم على حسب المود , وهتحس انك بتكلم واحدعنده انفصام ف الشخصية.... انهاردة رزين وعاقل , وبكرة لاسع , وبعد يومين رخم وبعدها كيوت وفريندلي طبعا الحكايه مش ناقصة جنان - كفايه اللي الواحد فيه .
.
4- اللزقه : والنوع ده عايز حزم ف التعامل معاه ,,, لأن كل كلامه انت فين ؟بتتاخر في الرد ليه؟ انت بتكلم حد ؟؟ ياعم وانت مالك بتتحشر ليه ......ولو قلتله ثواني هيقولك : ليه رايح فين؟ متتاخرش ...ايه ده انت لسه مجيتش ؟؟؟ وطبعا لو في منتدى يبقى ربنا يعين المشرفين, يركز في قسم معين يخيم فيه وعايز كل مواضيعه في القسم ده , ويهري القسم مواضيع , وتبقى سنه مش فايته لو المشرفين نقلوله موضوع او طلع موضوع مكرر . , ويقوم الدنيا , وميسبش المشرف في حاله ولا يسيب الاعضاء في حالهم , .
.
5- الناصح المصلح : صباح الصداع . مع كل جمله هتقولها هتاخد نصيحة وفيه عرض خاص: قول جملتين وخد اربع نصايح , العرض مستمر حتى نفاد الكمية , انا انصحك انك تخليه يحصل اخواته الي فاتوا يعني بلوك وديليت . رغم انه احيانا بيكون مفيد . وخاصة في المنتديات ,
.
6- الحبّيبّ : وده بقى بيقول كلام زي: انا فيا جاذبية وكل البنات بتعجب بيا ....... ايام ما كنت فى الكليه كنت عامل ازمه والبنات بتتخانق عليا...... المصيبة بقى ان اي جمله هتقولها هيفهم ان انت معجب , اصله مش بمزاجك هتحبه يعني هتحبه . , والانقح انه كمان يكون مغرور وتبقى كملت لو طلع كمان متسلط وبيحب يفرض رايه على الاخرين .
.
7- حريقة بنات : ده بقى لو في منتدى او ميل جروب تلاقيه مركز على كل البنات ومبيعملش اي حاجة تانية غير كده . . . , وبيحب المنظره وعايش دور حامي الحمى روميو , و الكوميدي بقى لما يتلخبط ويعتقد ان أسم اللي بيكلمه انثوي ويندمج وبعدين يطلع واحد صاحبه او شاب زيه . والكوميدي اكتر لما يزودها مع أي بنت وتديله على دماغه , والانقح انها تقول للبنات عليه انه شنكوتي .
.
8- الكداب : من اول الأسم والسن واي معلومةهيقولهالك كدب في كدب , ومتعرفش ليه ؟؟؟؟
وطبعا النوع ده بقى لازم تنصحه يغير اسمه ويخليه : الكداب أو أبو لمعه. , ده غير انه عامل كذا يوزر نيم لو في الماسنجر, واللي يضحك انه لو في منتدى برضه عامل كذا يوزر نيم ويعمل مواضيع ويخش مره على انه عيل ومره على انه راجل كبير ومره على انه شاب ومره على انه بنت , واللي يضحك اكتر انه يرد على مواضيع نفسه ويعاكس ف نفسه , وياويل اللي يقف في طريقة تبقى ايامه مش فايته طبعا .
.
9- العبيط :ده هتلاقيه على طول حاطط صورته وذنب عليك تتفرج عليها , ويشيل الصورة دي و
يحط التانية وكل شوية يفتح الكاميرا مع نفسه . , وكل يوم ف منتدى شكل ومتعرفلوش تجزه
واللي يغيظ انه بيدخل أي منتدى ويدعي أي ماساه انسانيه مرّ بيها , او يعمل نفسه من انصار فنان معين , او يسمي نفسه باسامي غريبة , عشان يلفت الانظار ويكسب التعاطف
. ده طبعا غير الردود المحيرة اللي بيردها في المواضيع او يعملك فيها بيفهم في كل حاجه ويفتي
.وده انصحك لا تتكلم معاه ولا تسمعله , سيبه زي م هوه .
.
10- بابا اوبح : ده ممكن يكون على النت من سنة 80 واتخرج واشتغل واتجوز وجاب عيال ولسه قاعد يتعرف على بنات وكل ما يكلم واحدة يقنعها انه مش متجوز وبيدور على عروسة وصباح السرحان ولو جربت كل يوم تدخل عنده بايميل غير التاني هتسمع قصة حياته كل يوم مختلفة .
.
النوع الاخير :وده احسن نوع ينفع تكلمه على النت , و هو الانسان المحترم اللى عارف حدوده ومبيتدخلش فى اللى مالهوش فيه وبيحترم خصوصيات الاخرين , وبيبقى دمه خفيف علشان ماتزهقش منه وبيحب يعمل اصدقاء كتير على النت وف المنتديات , وتلاقيه جد وقت الجد ومابيحبش الكدب و بيحب يهزر بأدب وقت الهزار , وتستريحله وانت بتتكلم معاه , وامين عليك ومعاك , . بس المهم انه ميكنش حاجه غير الحقيقة اللي بيظهر عليها .

وده انصحك تدوّر عليه ومتخسروش ابدا , لانه انسان حقيقي تسعد بصحبته .

كده خلصوا وماحدش يسألنى انت من انهى نوع فيهم علشان انا مش عارف

لحد هنا كانت نتيجه البحث
وطبعا اللغة في البحث بعتذر لكم عن طريقتا

لأنها منقوله مع تهذيب وتنقيح مني لبعض المفردات .

.

واللي جاي هو الاضافة:

ياتـــــرى........... صادفك مين في دول ؟؟؟؟

تعرف انواع تانيه تقولنا عليها او مواقف حصلت معاهم
ويا ترى النوع الأخير ده متواجد على الانترنت ولا ايه رايك ؟