فواكه البحر.. هتنوّر سفرتك

يوم الجمعة بتحلى اللمة على الأكل..

علشان كده حبينا نشاركك اللمة الحلوة دي..

ونكون معاكِ خطوة بخطوة، وإنتِ بتحضّري لأحلى وأجمل عزومة في الدنيا..

ونقدّم لك كل يوم جمعة اقتراح لعزومة مكوّنة من العصير والطبق الرئيسي وطبق السلطة وطبق الحلو..

علشان تنوّعي لعيلتك.. وتبهريهم بأكلاتك الجامدة..

وبمناسبة أعياد الربيع، قررنا إن فواكه البحر تكون البطل الأساسي على سفرتك..

يلّا بسرعة بقى ندخل المطبخ ونشوف هنعمل إيه..


**********************


عصير برتقال بالليمون
عصير برتقال بالليمون
طبعاً أنسب عصير ممكن تقدميه مع الأكلات البحرية هو عصير البرتقال مع الليمون؛ لأنه له فوائد كتيرة جداً للجسم، وكمان بيقضي على الميكروبات والسموم.

المقادير
4 كوب عصير برتقال
4 كوب ماء
كوب سكر
كوب عصير ليمون

الطريقة
1- اضربي المكوّنات مع بعضها في الخلاط لغاية ما السكر يذوب، وبعد كده صفيه وحطيه في الثلاجة، وعند التقديم صبيه في الكاسات وزيّنيه بشرائح الليمون والبرتقال وقدميه.. وبالهنا والشفا.

************************


شوربة الجندوفلي
شوربة الجندوفلي

المقادير
كيلو جندوفلي (قواقع)
بصلة كبيرة مقطعة
ملح وفلفل
بقدونس
زيت
حبهان
ماء

الطريقة
1- اغسلي القواقع كويس جداً.

2- أحضري وعاء وحطي فيه الزيت والبصل وحطيهم على النار، وقلبيهم لغاية ما البصلة تتشوح ولونها يتغيّر ويبقى ذهبي.

3- ضيفي القواقع وقلبيها على النار مع البصل والزيت لمدة 10 دقائق، وبعد كده ضيفي الماء، بس خلي بالك إننا مش بنحط مية كتير.

4- بعد كده ضيفي الملح والفلفل والحبهان، وسيبيها على النار لغاية ما تستوي.

5- حطي الشوربة في أطباق التقديم وهي سخنة، وزينيها بالبقدونس.. وبالهنا والشفا.

***********************


سلطة التونة
سلطة التونة
سلطة التونة دي من الحاجات المفيدة جداً وكمان خفيفة للناس اللي بتعمل ريجيم...

المقادير
علبة تونة
2 ثمرة طماطم
ثمرة فلفل رومي
ثمرة بصل
حزمة بقدونس
عصير ليمونة
ملح وتوابل

الطريقة
1- اغسلي الخضار كويس، وقطعيه أجزاء صغيرة متساوية في الحجم، وبعد كده اخلطيهم مع بعض.

2- افتحي علبة التونة وتخلصي من الزيت اللي فيها، وبعد كده حطيها على خليط الخضراوات، وتبلي السلطة بالملح وعصير الليمون والخل.

*********************


ملوخية بالجمبري
ملوخية بالجمبري

المقادير1/4 كيلو جمبري صغير متقشر ومغسول
ماء
1/2 كيلو ملوخية خضراء متخرطة ناعم
كمون + كسبرة ناشفة + ملح + فلفل أسود
بصلة صغيرة مفرومة
ثوم مفروم
فص كبير ثوم مقطع
ملعقة كبيرة سمن

الطريقة
1- أحضري وعاء وحطي فيه كمية من الماء وحطيه على النار وسيبيه لغاية ما يغلي، وبعد كده حطي عليه الملح والفلفل الأسود والكمون والبصلة المفرومة وفص ثوم مفروم.

2- ضيفي الجمبري على الماء المغلي وسيبيه على نار هادية لمدة 3 دقائق لغاية ما يستوي.

3- بعد كده ضيفي عليهم الملوخية، وقلّبيهم كويس مع بعض، وسيبيهم لمدة 5 دقائق على نار هادية مع التقليب.

4- اعملي تقلية الملوخية بالطريقة العادية، وهي إنك تسخني السمنة على النار لغاية ما تتقدح، وبعد كده ضيفي عليها الثوم مع قليل من الملح والكزبرة الناشفة، وقلبيهم كويس على النار لغاية ما الثوم لونه يصفر، وبعد كده ضيفيها مباشرة على الملوخية.

5- قلبي الملوخية على النار لمدة دقيقة واحدة، وبعد كده حطيها في أطباق التقديم وقدميها وهي سخنة.. وبالهنا والشفا.

***********************


كباب الفاكهة مع الكريمة
كباب الفاكهة مع الكريمة
أجمد حاجة ممكن نحلي بها بعد الأكلات دي، هي كوكتيل الفواكه، بس النهارده هنعمله بطريقة جديدة وشكلها شهي جداً، بس الطريقة دي يفضل إنك تجهزيها قبل ميعاد الأكل على طول، علشان الفاكهة يفضل شكلها طازج.

المقادير
4/1 كيلو فراولة
2/1 ثمرة كنتالوب مقشرة ومتقطعة لمكعبات
2 ثمرة موز متقشرة ومقطعة لشرائح
2 ثمرة تفاح مقطعة مكعبات
فصوص برتقال متقطعة مكعبات
4/3 كوب كريمة لباني مخفوقة (اختياري)
عيدان خشب
ملحوظة: ما تنسيش ترشي عصير ليمون على التفاح والموز علشان لونهم ما يتغيّرش.

الطريقة
1- أحضري الفراولة واغسليها كويس، وشيلي الرأس بتاعتها.

2- أحضري العيدان الخشب وابدئي اغرسي في كل واحدة منها قطعة مختلفة من كل نوع فاكهة، واستمري على كده لغاية ما الفاكهة تخلص كلها.

3- اضربي الكريمة وقدميها مع الفاكهة، وممكن تحطي عيدان الخشب دي في صينية وترشي عليها سكر، وتدخليها الفرن في درجة حرارة متوسطة وتسيبيها لمدة 15 دقيقة، هتلاقي شكلها وطعمها تحفة.

يلّا بقى بسرعة مستنية إيه.. قومي ادخلي المطبخ.. وجرّبي الوصفات.. بس ما تنسيش بقى بعد ما تخلصي.. تبعتي لنا وتقولي لنا أخبار العزومة إيه..

ولو عندك وصفة جامدة تحبي تشاركي بها معانا يبقى ادخلي بسرعة على لينك "ورينا شطارتِك" وابعتيها عليه، وإحنا هننشرها على "قمر 14" باسمك.. سلاااااااااااااااام،،،،